حرب روسيا على اوكرانيا

الأغرب ان الدول الأوروبية بتعلن عن تفاصيل شحنات السلاح اللى هتبعته على وسائل الإعلام.. وهنا خلينى أنا أسألك سؤال.. لو انت اللى بتحارب.. هل ينفع حد يكشف تفاصيل قدراتك العسكرية؟.. القدرات العسكرية فى الحروب سر حربى مينفعش حد يعرفه.. الجواسيس فى الحروب شغلتها انها تعرف تفاصيل السلاح اللى عندك علشان تنقله لبلدها وبالتالى يقدروا يواجهوا السلاح اللى معاك.. طيب انت النهاردة طالع تقول لروسيا انا هبعت لأوكرانيا 200 صاروخ مضاد للطائرات.. أنا هبعت لأوكرانيا صواريخ غافلين مضادة للدبابات.. أنا هبعت شحنات وقود.. طيب ما روسيا هتطلع تضربها قبل ما تدخل لأوكرانيا.. ده لو روسيا مدخلتش كييف قبل ما السلاح يوصل أصلا.. وبالتالى انت هنا بتدرك ان أوروبا بتبيع كلام للشعوب.. مجرد كلام للاستهلاك المحلى.. أوروبا بتحاول تهدي الرأى العام اللى بيطالبها بمواجهة روسيا.. انتو زعلانين.. طيب خلاص احنا هنبعت سلاح.. اهدوا بقى..

سيدى المواطن القوات الروسية قبل تصوير الحلقة دى كانت بتنفذ عمليات إنزال فى جنوب غرب العاصمة الأوكرانية كييف.. يعنى الموضوع بيخلص..
سيدى المواطن القوات الروسية اللى دخلت أوكرانيا رفعت علم الاتحاد السوفيتى مش علم روسيا.. انت فاهم ده معناه ايه؟.. معناه ان روسيا بتقول للعالم كله وتحديدا أوروبا وأمريكا.. إنى مش بحارب أوكرانيا.. أنا بحاربكم انتم.. وان الحرب العالمية التانية لسه منتهتش.. أو حتى لو انتهت.. فأنا بدأت حرب عالمية تالتة ومستنيه ألمح حد فيكم.. روسيا النهاردة بتقول للعالم كله ان الكلمة كلمتى والشورة شورتى.. نفس اللى عملته ألمانيا فى بداية الحرب العالمية التانية.. لما بدأت بدول ضعيفه زى أوكرانيا.. والكل كان متخيل ان ده اخرها.. لكن بعد شوية وقت فوجئ العالم كله بإن ألمانيا دخلت فرنسا وبتحارب بريطانيا..

روسيا النهاردة بتعيد نفس المشهد تانى.. لكن بدأت بأوكرانيا.. ومن يومين هددت فنلندا والسويد.. والصين الناحية التانية طلعت طيارات مقاتلة تخترق المجال الجوى فى تايوان.. فأمريكا ردت عليها وبعتت مدمرة بحرية للسواحل التايوانية.. اللى هو بالبلدى كده أنا موجودة هنا يا صين.. ولو ضربتى هضرب.. وهنا سؤال.. لما انت قادر تبعت مدمرة بحرية تواجه الصين عند تايوان.. مبعتش ليه مدمرة بحرية زيها تواجه روسيا عند أوكرانيا ؟.. تحب أجاوب أنا ولا تجاوب انت؟.. لو معندكش إجابة تقدر تتفرج على حلقة معركة المحيط الهادئ.. شرحنا فيها اللى بيحصل هناك بالتفصيل.. لكن للى مش عايز يتفرج فالإجابة المختصرة هى ان أوكرانيا بالنسبة لأمريكا مش بالأهمية الكافية اللى تخليها تغامر بالدخول فى حرب عالمية تالتة.. تايوان أهم.. ليه؟.. تقدر تشوف حلقة معركة المحيط الهادئ.. خلينا فى حلقة النهاردة نركز على أوكرانيا..


المصادر
https://cnn.it/3pnlpG5
https://bit.ly/3tfHVBJ
https://bit.ly/35dLMHv
https://bit.ly/3spRSgz
https://bit.ly/36CV6oA
https://bit.ly/3C2BLZQ
https://bit.ly/3hqK9Zm
https://bit.ly/3MaV1sL
https://bit.ly/3K2tibH
https://bit.ly/3teOjcz
https://bit.ly/3pmH8xO
https://bit.ly/3M7ZIDz
https://bit.ly/3sqGxwM



#المواطن_سعيد #روسيا_وأوكرانيا